الشخص اللي طبيعته آمنة مش هيبقى إنعكاس لك، يعني مش هتلاقي قدامك " نُسختك" و مش هتحس إنه " توأم روحك" و إنت "لسة بتتعرف عليه" و لا هيبين لك إنه " الوحيد" اللي قادر يفهمك و يخمن إنت محتاج إيه، ليه؟

لإن الشخص اللي طبيعته آمنة مش مهتم إنه يقنعك بإنه شبهك و لا مهتم إنه يقنعك إنه الوحيد اللي فاهمك لإنه الحاجات دي مش بتيجي في باله أصلًا عشان هو مش بيصطادك، هو هيتواجد و هيظهر نفسه و اللي هي هتكون بتحمل إختلافات كبيرة عنك و كذلك هيبقى واضح إنه لسة بيحاول يفهمك " لإن دة الطبيعي" مش الطبيعي إنك تكون لسة بتتعرف على حد و هو مبين لك إنه الذكي اللي قدر يفهمك أكتر من أي حد يعرفك و يبين لك إنه إنتم مشتركين في كل حاجة و يبين إنه قادر يخمن إنت محتاج إيه بدون ما تنطقه و لا الطبيعي إنه فعلًا يدي لك ردات الفعل اللي انت متوقعها طول الوقت و مايعملش أي حاجة برا توقعاتك الشخص اللي طبيعته آمنة هيبقى مهتم يسمعك لكن مش هيستعرض لك قدراته في إنه يحدد مكنونات نفسك بدون ما تتكلم، هو مش بيلعب، هو هيتكلم طبيعي، هيسمعك بشكل طبيعي، مش هيقدم لك أداء سينمائي عشان يبهرك، هيسمعك و هيسيء فهمك في أوقات و دة الطبيعي عشان هو مايعرفكش، مش هيتظاهر إنه فاهم كل حاجة.