إنت مكمل في علاقتك مع الشخص المؤذي لإن بيجمعكم أوقات جميلة، لإنه أكتر شخص كاريزماتك إنت صادفته، لإن مافيش حد بيقدر يحسسك بالحاجات اللي بيحسسها لك، لإنه بيعرف يخليك تحس إنك أهم حد في العالم و إن الحياة ممكن تكون مثالية فعلًا، لإنه بيعرف كويس إزاي يبهرك، بس... إنت محتاج تبص على الأضرار اللي بتحصل لإن الأضرار دي بتدمرك نفسيًا بالتدريج، وجوده بيكلفك سلامك النفسي لإنه برضو بيلاعبك و بيكدب عليك و بيشكك في نفسك و له أوقات بيتعمد يثير غيرتك فيها بشكل مؤذي و بيتجاهلك ف أوقات كتير جدًا و بيبقى قاسي و وقح و بارد و جاف معاك كتير جدًا، محتاج تركز على إنه إنت مش عارف تركز في شغلك كويس و لا عارف تركز في مذاكرتك و لا عارف تنبسط مع صحابك لما بتقابلهم لإن دماغك في حالة مستمرة من الإنشغال بكل حاجة بيعملها لإنه مش بيطمنك، إنت عايش في تهديد، بتاخد متعة معاه بس مقابل المتعة دي إنت عايش في تهديد و مش قادر تطمن، محتاج تركز على إن إنت بيجيلك أوقات بتبقى مش قادر تاكل فيها حتى و مش قادر تستمتع بحاجة و لا قادر تمارس حياتك بشكل طبيعي لإنه هو بيكون متغير عليك بشكل مجننك، بيعاملك على حسب مزاجه و بيفقد تعاطفه تجاهك و مش بيتواجد في الأوقات اللي انت محتاجه فيها كتير جدًا جدًا.