عندي مشكلة وحدة مع زوجتي وهي ذوقها باللبس العام والخاص يجلطني والله العظيم! نفس الأشكال نفس الألوان تنعاد وتتكرر، ياناس صرت اكتئب من ذوقها وأرحمها بالمناسبات والأعياد إذا شفت لبس قريباتي ماشاءالله ذوق رهيب، ما أدري من فين يجيبون ملابسهم وكيف يختارون، مع إن أكثرهم أقل جمال من زوجتي لكن اختيارهم للبس يخليهم أشيك وأجمل زيادة. عن إن زوجتي بيضا ماشاءالله بياض وأنا مو سالفة مقارنات أو عين طويلة، لا والله إني مقتنع بزوجتي الحمدلله، بس من جد اللبس يعطي بهجة وجمال والألوان تفرق. ومو سالفة ملابس عارية، حنا أصلا الحمدلله مجتمعنا محافظ وماعندنا ملابس قليلة أدب. البناطيل هذي ناسي شكلها أصلا، كله بجايم في البيت وقمصان نوم، مع إن زوجتي متعلمة وتتابع الموضة يعني مو قصة جهل، بس اقتناع بالذوق. في بداية الزواج حاولت أتدخل وأوجهها لأشكال وألوان، بس كانت تزعل وأحيان تقولي هذي قديمة ماحد يلبسها وش دراك، أو ماتعجبها، وأحيان نزعل من بعض أيام ثم تركتها براحتها. واللبس الخاص نفسه، ماتلبس شي يبرز جمال جسمها، كله واسع وفضفاض وتكره أي لبس ضيق. طبعا الموضوع مايخص المادة لأني كريم معها وإذا نزلتها السوق ما أحدها بميزانية، أقولها اشتري اللي يعجبك. هل فيه حل أقدر اعدل ذوقها؟ لأني تعبت صدق وأتمنى هذي الأشياء تصلح لي والا أتأقلم وأنكبت خلاص!